Welkom, Besoeker
Welkom, Besoeker
Taal waarskuwing*

Titel: Vryval

Deur Seirdna
Datum gepubliseer: 22 Junie 2020 Aantal woorde: 168 151 Kere gelees 3

hoe vry is vertes in die niet
en al die sterre wat verskiet,
in hierdie huisgebonde
ankertog van tyd?

hoe vry is wolke wat kan sweef
tussen winde wat herleef,
wie vir wagtings
by ‘n bliksemstraal moet pleit?

hoe vry dan is ‘n vloeivallei
langs die hange van ‘n berg,
teen die onmeetbare kontoere
van die son?

hoe vry is varsgeplukte vrugte
uit ‘n bronbegiete boord,
in ‘n afgeleefde pakhuis
van beton?

hoe vry die toekoms van ‘n kind
in ‘n blikkombuis se winter,
kort van water
met ‘n kors gemufde brood…

wie nog hunker na vars liefde
en ‘n hongerhoop bly koester,
in sy vasklou
aan die vryvaltrein van dood?

Seirdna 21.06.2020

Neologismes in sinoniem

“ankertog” – reis wat vas is en nêrens heengaan nie
“wagtings” – oomblikke van rus
“vloeivallei” – ‘n vallei waarvan die lyne in die omgewing kosmeties inpas.
“bronbegiete” – toegevoeg met al die noodsaaklike bykomstighede
“blikkombuis” – kombuis in ‘n plakkerskamp
“vars liefde” – aaneenlopende, hernieude liefde
“vryvaltrein” – ‘n versnellende reis sonder stop




TEMAS
4 Kommentaar
  1. Anze

    22 Junie 2020

    Pragtig, baie dankie vir jou bydrae tot die Junie 2020 – Vryheid projek

  2. Viooltjie

    22 Junie 2020

    Goeie werk, Sierdna. Die gedig lees lekker met goeie beelde en interessante nuutskeppings. Ek het dit baie geniet.

  3. Seirdna

    23 Junie 2020

    Baie dankie vir die lees en mooi kommentaar Viooltjie

  4. Seirdna

    25 Junie 2020

    Dankie Anze

Laat u kommentaar

GESKRYF DEUR

Jy moet ingeteken wees om boodskappe aan hierdie skrywer te kan stuur.

Publikasies: 32
Kommentaar telling: 67

Gebore in Oos Londen; Grootgeword in Steynsburg Noord-Oos Kaap. Getroud  3 seuns, twee kleinseuns en 'n kleindogter. Van kleins af lief vir skryf. Opstelle was my ding en ek was nog altyd versot op die digkuns. Mal oor sport; het van jongs af briewe vir die Springbok rugbyspelers geskryf en hul handtekeninge versamel. Het later self provinsiale rugby vir die destydse Transvaal (Leeus) gespeel en saam met my ou skoolhelde soos Kevin de Klerk op die veld gedraf. Het Dr. Craven ontmoet en in 'n Curriebeker eindstryd gespeel. Dit was ongelooflik. Daar is twee diersoorte wat deel is van my lewe en vorming nl. perde en honde. Perde is sus en honde is so, beide wonderlik in my wese ingegrafeer. Geen gedig kan die perd se grasie en prag, of die hond se liefde en toewyding genoeg vereer nie. Die digkuns trek my soos 'n magneet. Ek wil dig oor alles om en in my, met ritme en rym. Sou hierdie talent my onderskei; wil ek dit aan my Heer toewy en gedigte skryf met 'n kwinkslag ,wat dalk die dissipels laat lag en hopelik miskien eendag in die hemelse biblioteek geag en gelees word.      

Gebruikers Aanlyn

0 Lid, 57 gaste aanlyn

Bydrae Totale