Welkom, Besoeker
Welkom, Besoeker

Titel: Oor Pearly Beach (’n brief aan Shirley van Engeland)

Deur Viooltjie
Datum gepubliseer: 9 Februarie 2020 Aantal woorde: 226 97 Kere gelees 1

Beste Shirley

Ek loop vanoggend met ’n voetpad langs
deur skouerhoogte strandveldbos
oor gladgeskuurde klippies
(deur die eeue hier gelos)
tot op die wye ope strand.

Ek sou ewig hier wou bly, as ek kon.
Op hierdie plek waar branders
sonder ophou
oor die aarde breek
(dié plig hul opgelê, wil hul mos teen rotse wreek)
en waar krappies in vlak poele
struikelloop en sand omwoel.

Kan oseane dan so groenblou wees;
die kleur daarvan kan ek nooit beskryf nie.
En nog nooit was seë so onkoud oor
my voete en my lyf nie.

Ek wens ek kon dit met jou deel:

Die skulpgruis wat my sole skraap.
Die wind wat oor die landskap streel.
Die seebamboes wat bruin en roes
patrone oor die wit sand skryf.
Die meeue wat op golwe dryf
en ragfyn tuintjies
– stukkies skulp en alg –
onwillekeurig gerangskik,
deurmekaar gestrik
in groen en pienk en pers.

Elke mens moet ongeskoen
oor só ’n strand kan wandel
terwyl wolke (byna purpergrys)
net so bo die die water hang.
Sulke vistas sal my altyd laat verlang;
ek sou dit graag vir jou wou wys.

Shirley, ek stuur groete.

En dalk,
as ek ’n duisend foto’s stuur,
sal jy ook hierdie somersoggend
op Pearly Beach onthou.
Maar jou huis is nou so ver van hier
…en dit is winter daar by jou.

© Carma Shaw
15 Januarie 2020
14:46




TEMAS
1 Kommentaar
  1. Seirdna

    27 Februarie 2020

    Baie mooi geskryf Carma. Laat my dink aan Shirley Valentine?

Laat u kommentaar

GESKRYF DEUR

Jy moet ingeteken wees om boodskappe aan hierdie skrywer te kan stuur.

Publikasies: 370
Kommentaar telling: 925

Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat ek te sê het, en dat julle lekker saam sal lees :-)

Gebruikers Aanlyn

0 Lid, 54 gaste aanlyn

Bydrae Totale