Welkom, Besoeker
Welkom, Besoeker

Titel: ‘n Vrou van seisoene

Deur Viooltjie
Datum gepubliseer: 5 Julie 2018 Aantal woorde: 266 434 Kere gelees 2

i.
laasjaar
(toe dit lente was)
het sy Tulbagh toe gery
en sy onthou nog
hoe groen die lande was
waar die koring en die wingerde gedy

die blouberge
het – soos altyd –
die Boland vol gelê
en daar was skape met hul lammers
wat teen die rante loop en wei
en Aronskelke,
wat roomwit bloei
oral langs die heinings en die watervore
waar hul groei

ii.
haar somer was vol son en see
van Melkbos tot by Strandfontein
en skemeraande langs die water
wyl die nadag agter rotse
en dawerende branders kwyn

soms het sy ‘n bont sarong
om die ronding van haar heup gebind
en die kind wat in haar sluimer
laat ontwaak…
sandaal se gespe losgemaak
en weer ‘n kaalvoetspoor getrap
in die growwe-sag van warm sand

iii.
vroegherfs
was die Weskaap aan die brand
die Suidoos het die vuur gestook
en die rook het hoog en wyd
oor Stellenbosch en Jonkershoek
gehang…

en toe
tóé het sy na reën verlang
nes die fynbossaad wat in die asstof lê
en soos lelies van die vuur
wat – binne enk’le dae –
‘n blomsteel laat verrys
deur die veskroeide aarde
se puin, en swart
en grys

iv.
aanstons
sal die winter kom
die Noordweswind sal ruk en suis
die reën
(wat op haar sinkdak val)
sal somtyds sag wees
soms
‘n luide storm en gedruis

die dae sal skemer word
kort en koud
en klam

maar haar lampglas
sal sy blink vryf
en paraffien sal warm brand
waar sy bakhand staan en bedel
(om ‘n bietjie hitte)
naas die flikkering
van ‘n vlam

© C. Shaw




TEMAS
14 Kommentaar
  1. Anze

    5 Julie 2018

    sjoe dis ongelooflik mooi, is mal oor die metafoor wat jy gebruik het, waarlik n seisoene mens!

  2. Alet

    5 Julie 2018

    Ek hou van jou metafore. Wat is besonderse gedig. Sjoe, ek sal beslis moet begin mediteer om by te hou … en ons het nog nie eers begin nie 🤤

    • Viooltjie

      5 Julie 2018

      Baie dankie, Alet. Ek het ook gedink ek sal moet sokkies optrek nadat ek jou gedig gelees het 😀

  3. Francois Meyer

    5 Julie 2018

    Ek hou van elke seisoen ☺

  4. Callie Vermeulen

    5 Julie 2018

    Dit kan net Carma wees! Pragtige woorde en beelde… en so ‘n volronde vertelling.

  5. Pendoring beoordelaar 2

    6 Julie 2018

    Jou woorde roer my siel.

  6. Driekie

    9 Julie 2018

    Pragtige gedig, soos altyd uit jou pen.

  7. Loretta Szikra

    13 Julie 2018

    Baie baie mooi roerende gedig Carma.

Laat u kommentaar

GESKRYF DEUR

Jy moet ingeteken wees om boodskappe aan hierdie skrywer te kan stuur.

Publikasies: 344
Kommentaar telling: 915

Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat ek te sê het, en dat julle lekker saam sal lees :-)

Gebruikers Aanlyn

3 Lede, 63 gaste aanlyn

Bydrae Totale