Welkom, Besoeker
Welkom, Besoeker
Taal waarskuwing*

Titel: MARLBORO WALMS EN SKIETGEBEDE

Deur Francois Meyer
Datum gepubliseer: 19 Julie 2017 Aantal woorde: 410 440 Kere gelees 6

Hulle sê mos mense wat nie vloek terwyl hulle bestuur nie, hou duidelik nie hulle oë op die pad nie. Ek praat nie van al die slaggate wat groter as ons president se fire pool is nie, maar eerder van diegene wat skielik agter ‘n bos uitspring, jou na jou asem laat snak en jou forseer om in ‘n kwessie van nul tot honderd in 0.5 sekondes jou verkeersgordel aan te sit.

Dit was 2013. Ons het ‘n voertuig in die Oos-Kaap gaan haal. Ek het nog my 1400 Golf gery – SONDER. ‘N. LISENSIE. Op pad terug na die Vrystaat, stop ons in Aliwal-Noord vir ‘n laatmiddagete. Pizza… en wyn! Een glasie is mos nog onder die drinkgrens en dit was ‘n lang dag op die pad.

Ons ry verder. My senuwees hang aan flarde. Ons is al verby twee padblokkades en op die Vrystaat se winterhorison sien ek nog ‘n spannetjie spoedspeurders. ‘n Gut feeling sê vir my dat ek nié third time lucky gaan wees nie. Soos ons nader aan die blouligbrigade kom, sweet my hande en dit voel kompleet asof ek die stuurwiel vol baba-olie smeer (op ‘n nie-kinky manier). Ek rook die een sigaret na die ander; wetend dat my asem na drank ruik en boonop het ek ook nie ‘n bestuurslisensie byderhand nie. Ek verander die woorde van die Lady Gaga liedjie wat oor die radio speel na “just drive… gonna be okay!”

My medebestuurder jaag soos ‘n besetene, maar ek weet as ek nou voet neersit gaan hulle foto’s van my neem sonder dat daar tyd gaan wees om te glimlag. Ek sien hy is deur die verkeersorgie en ek hoop en bid dat hulle tog so grootmoedig met my ook sal wees. Tevergeefs. Hulle trek my af. Ek parkeer langs die pad en probeer my broek droog hou. Tot my verbasing, kom daar ‘n jongerige spoedkoekie aangestap. Sy buk by die venster en dit was die eerste keer in my lewe dat ek bedags die melkweg gesien het. Ek draai die venster oop, gee vir haar twee blou skille en sê: “Gaan kry vir jou KFC vir aandete.”

Sy neem dit en wens my ‘n voorspoedige reis toe. Ek sou nie toegelaat het dat so ‘n stuifmeelkoekie haar driewiel voor my kom spin nie. Later daardie aand in Bloemfontein toe ek die motor se deur oopmaak, sien jy net Marlboro walms en skietgebede die lug beklouter… Volgende keer sal ek harder bid en minder rook.




TEMAS
4 Kommentaar
  1. Okatopi

    19 Julie 2017

    Ja nee 🙂

  2. Poetrydancer

    19 Julie 2017

    Francois, ek het hierdie stukkie nou rerig geniet. Lekker lees humor prentjie. Pragtige beelde van die baba olie nie vir plesier nie en dan in die slot waar die walms beskryf word.

    • Francois Meyer

      21 Julie 2017

      Ek is bly dat jy dit geniet het! Baie dankie vir jou saamlees! 🙂

Laat u kommentaar

GESKRYF DEUR

Jy moet ingeteken wees om boodskappe aan hierdie skrywer te kan stuur.

Publikasies: 39
Kommentaar telling: 36

Francois is op 21 Januarie 1994 in Bloemfontein gebore. Hy was ‘n leerling aan die Hoërskool Fichardtpark en sy digkuns is reeds op skool geprys. Hy debuteer met Tempora Animus op 19-jarige ouderdom in 2013. Vandaar het hy Onder die Dekmantel(2015), Digtershart (2016) en Pendulum (2017) as digbundels vrygestel. Francois is ‘n kampvegter vir lupus en sy prosaboek, Die wêreld deur haar oë, was vir twee weke die topverkoper op Kobo Books in vyf kategorieë. Hierdie publikasie is ook in Engels vrygestel. In 2017 word hy as Ink Skryf in Afrikaans se rubriekskrywer van die jaar aangewys en verwerf ook ‘n tweede plek in die kategorie Digter van die Jaar. In 2018 ontvang hy ‘n Radio Rosestad Roostoekenning vir sy bydrae tot die Afrikanerkultuur.

Gebruikers Aanlyn

3 Lede, 130 gaste aanlyn

Bydrae Totale