Welkom, Besoeker
Welkom, Besoeker

Titel: Lag is die beste medisyne.

Deur Marlene Erasmus
Datum gepubliseer: 29 Februarie 2020 Aantal woorde: 399 48 Kere gelees 1

(Brons)

Lag is die beste medisyne.

Ek hoor nog die oumense met die sê-ding: “Lag en die wêreld lag saam, huil en jy huil alleen.” As kind was dit vir my nogal vreemde begrip om te verstaan, want sien: as jy huil wil jy mos darem nie heeltemal alleen sit en huil nie. Wel, nou dat ek grootmens is, besef ek dat mense veel eerder rondom ʼn humoristiese mens as ʼn smartvraat wil wees.

Die lewe is so vol van seer en ernstige sake dat mens baie maklik in die strik kan trap om die humor in die lewe mis te kyk. Hoe jy reageer op die swaarkry in die lewe is en bly elkeen se eie keuse maar om die lewe bietjie ligter te maak met ʼn skeut humor, het niemand nog nooit skade gedoen nie.

Het jy al ooit in ʼn vol winkelkompleks of tussen klomp mense kliphard uitgebars van die lag? Die effek is beslis so aansteeklik soos Die Groot Griep van die jaar 1918. Daar is beslis min dinge so lekker as om saam met ʼn sprankelende mens te wees wat ʼn goeie humorsin het.
Baie interessant is die feit dat die mens die enigste lewende spesie is wat humor kan verstaan en ook waardeer. Wat wel baie waar is, is dat nie alle dinge vir almal ewe snaaks is nie, die een kan homself ʼn papie lag vir iets wat vir die volgende persoon geensins snaaks is nie.

Van een ding kan jy gewis wees: die ou suurknolle in die lewe lyk of hulle suurlemoene gevreet het en die bitterbekke lyk of hulle enige oomblik kan gal braak terwyl die vrolik, opgewekte “soettande” van die lewe lyk of hulle die soet in die lewe geproe het en dit waardeer!

In elke krisis is daar ook ʼn tikke humor te vind. Ek onthou een van die mooiste kinderherinneringe in my lewe was die dag toe die wasmasjien se uitlaatpyp uitgeglip het en ons lang gang in ʼn “glip-en-gly”-baan omtower het. Ma het nie ʼn oomblik gehuiwer om die krisis in ʼn pret-ervaring te omtower nie.

Ek wil afsluit met die volgende aanhaling:
In Elsabé Aldrich se snaakse boek Vonkelkyk op die lewe skryf sy: “Humor is soos ’n gewilde, duur velroom. Jy vermoed dit doen nie alles wat dit belowe nie, maar jy voel beter as jy dit gereeld aanwend.

Laat ons lag en die wêreld sal ʼn beter plek wees …

©Marlene Erasmus
29/09/2019

(400 woorde)




TEMAS
1 Kommentaar
  1. Anze

    2 Maart 2020

    Pragtig, baie dankie vir jou bydrae tot die Februarie 2020 Limeriek projek

Laat u kommentaar

GESKRYF DEUR

Jy moet ingeteken wees om boodskappe aan hierdie skrywer te kan stuur.

Publikasies: 39
Kommentaar telling: 4

Gebruikers Aanlyn

0 Lid, 50 gaste aanlyn

Bydrae Totale