Jy ‘s my Papawer-son
waar my beeld ‘n tango dans
in die loom dagbreek van jou oë
wil ek wit aronskelke kweek
sodat ek die eggo van jou stem
tussen die ragfyn blare in wit kan raam,
sodat jou asem my telkens weer
soos ‘n somersbries kan omhels
as my naam deur die branders
van jou warm lippe breek
wil ek ‘n tenger kosmos pers tapyt
teen die wande van my hart
soos ‘n tapesserie gehang,
sodat die spieël van jou
innerlike glad weerkaats
as jou liefde deurbreek soos die rooi
van ‘n papawer-son wat die horison verskeur
my hart opnuut kom verf in botsels lentereën
dan voel ek bedwelm en immer veilig
toegespin in die bakhand palms
van jou menswees-kokon
gemaak van liefhê sy
©Anzé Bezuidenhout
Anze
Woorde is my asem en skryf my passie!!! Ek waardeer elke stukkie kritiek, verkieslik positief, maar kan die negatiewe ook hanteer. Dankie dat jy die tyd neem om na my werke te kyk en dit te beoordeel. Ek is n Boeremeisie in murg en been... mal oor die wye natuur van plaaslewe wat my omring Ek is getroud met die wonderlikste man (Willie). Ons is geseend met 3 pragtige dogters en 'n kleinseun en 3 kleindogters. My verhouding tot my Skepper loop baie diep en ek dank Hom elke dag vir al die voorregte en genade gawes wat ek so onverdiend ontvang... Loutering is deel van my lewe en ook daarvoor dank ek Hom daagliks want dit maak dat daar altyd groei in my lewe is...
1 Kommentaar
Maak 'n opvolg-bydrae
Jy moet aangemeld wees om 'n kommentaar te plaas.
neels
sjoe Anze jy laat my hoendervleis kry