Welkom, Besoeker
Welkom, Besoeker

Titel: Gee, gee, gee.

Deur Kiekies
Datum gepubliseer: 15 Augustus 2019 Aantal woorde: 282 134 Kere gelees 3

Vergun my asseblief . . . verskoon my asseblief . . . laat my asseblief toe . . . om ’n ongeskikte wilde wind, hardop en oopmond, op te breek . . . bbluaaaarghh! Jammer en dankie.
Hierdie wilde wind het in my ingewande opgebou, omdat mense, blykbaar reken ek het eindelose fondse in my bliktrommeltjie, onder my bed. En dat daai trommeltjie en die weduwee se kruik sinoniem is.

In die laaste week alleenlik, ontvang ek hierdie versoeke:
‘My seun is ’n student en ek kan nie meer die betaling van sy klasgeld en verblyf en vervoer byhou nie. As die sewe honderd kontakte op my WhatsApp, net tweehonderd rand via die ‘Back a Buddy’ stelsel bydra, sal al sy kostes gedek wees.’

‘My seun het die rugbyspan gehaal en hulle gaan op toer Gauteng toe. As elkeen net x-bedrag bydra, sal die toergeld gedek wees.’

‘Beveg kanker. Ons hou konsert, want Piet en sy seun Pieter en vriendin Sara, is al drie met kanker gediagnoseer. Om hulle te help met mediese onkoste, koop asseblief soveel as moontlik kaartjies teen een honderd en tagtig rand elk. Of maak ’n donasie.’

‘Ek is Pietie Pieterse. Ek het die Boland Rolskaatsspan gehaal. Ons gaan nou na die SA kampioenskap. Sal tannie asseblief geld bydra?’

Nou vra ek so ordentlik as wat my moerigheid my toelaat: ‘Waar was jy toe ek my kinders se studiegeld self betaal het? En waar was jy toe ons in die sweet van ons aangesigte, mediese fonds bydraes gemaak het. En waar was ek toe julle elke tweede naweek rond kerjakker het? Nee wag, ek antwoord self. Ek het geld verdien en gespaar om my kinders op toere en kampioenskappe te stuur!’

Verdomp, lyk ek soos ’n spaarvarkie sonder ’n slot?




TEMAS
3 Kommentaar
  1. Anze

    15 Augustus 2019

    Pragtig, baie dankie vir jou bydrae tot die Augustus 2019 projek

  2. Amanda

    16 Augustus 2019

    Net so. Dan kyk hulle jou met sulke skaapogies aan as jy nie op die borgvorm wil of kan teken nie.

  3. Kiekies

    16 Augustus 2019

    @amanda Hierdie 4 gevalle is nie eers borg vormpies nie. Dis volwassenes wat dit op WhatsApp en video clips sit en prontuit geld vra, Of is dit bedel? Kyk ek weet, om te gee is ‘n seën, maar vir hoeveel mense dan? Hierdie Back a buddy sisteem is ‘n vars onding wat kop uitsteek!!

Laat u kommentaar

GESKRYF DEUR

Jy moet ingeteken wees om boodskappe aan hierdie skrywer te kan stuur.

Publikasies: 45
Kommentaar telling: 558

Stories gebeur met my. Rondom my. Naby my. Al wat oor bly is om dit oor te vertel.

Gebruikers Aanlyn

3 Lede, 113 gaste aanlyn

Bydrae Totale