Welkom, Besoeker
Welkom, Besoeker

Titel: Die Heuwel het nie haasgate nie.

Deur Amanda
Datum gepubliseer: 16 April 2019 Aantal woorde: 343 67 Kere gelees 2

Kyk, wragtag skrik ek nie die paashaas nie. Ek verafsku hom. Klein wollerige hasies, konyntjies of springhase had ek nie probleme mee nie. Nee, daardie Haas Das mens haas met die groot blou oë; daardie haas bring die lelik in my uit.

April maand is vakansie maand. Almal weet dit. Rondom Pase word verlof dae skelm ingedruk. Pappa en mamma probeer die naweek so lank as moontlik rek. Rangskik net mooi en jy het ‘n hele twee weke van tuisbly sonder om jou verlof regtig ‘n knou te gee. Bly net uit die winkels uit met jou kinders. Haas baniere vul die gange. Paaseiers met stukkende boepies lê die rakke vol. Oral is kermende kleintjies met bruin gesmeerde bekkies. Kwylende mondjies en taai handjies besmeer elke trollie. Ek gril tot in my tone.

Nugter alleen weet waar die konneksie tussen haas en Paas lê. Die kruis was op ‘n heuwel. Miskien was dit Watership Down en nie Golgota nie, wie weet? So stil stil bekruip die onheilige jou. Gebruik kinders om sy onheiligheid in die mensdom te saai. Die saad sal groei daar waar dit op goeie grond val. My grond is te klipperig vir sy sjokolade saad. Dit lê en smelt in die lig van Bo. My kruis dra ek elke jaar. Gevonnis tot opstoker. Wie wil nou ‘n kind se liefde vir die menshaas so wreed veroordeel. Dis mos onskuldige pret.

Selfs in ons kerke wurm die duiwelskind hom in. Hasies en eiers word oral uitgestal. “Taaaaa, vat vir jou ‘n ou eiertjie my kind.” Onskuldig, nes die ou hasie. Hierdie jaar gooi ek die persoon wat durf waag my ‘n eier aanbied op Goeie Vrydag. Ek pooitjie daai haas binne in ‘n rolstoel in. Geen Pastoor of kerklid sal my verander nie. Ek woon kerk by vir die sielevoeding. Elke jaar wens ek, bid ek dat ek genoeg moed bymekaar kan skraap. Soos Yeshua die sweep te kan gryp en daai Haas met sy mandjie eiers terug in sy gat te jaag. Wyk satan! Die heuwel het nie haasgate nie!




  • TEMAS

    Laat u kommentaar

    GESKRYF DEUR

    Jy moet ingeteken wees om boodskappe aan hierdie skrywer te kan stuur.

    Publikasies: 21
    Kommentaar telling: 8

    Ouma van Vier woelwaters. Ma van 5 (2 stief) en vrou van 'n wonderlike Godsman. Woon tans in Alberton. Skryf is my uitlaatklep. My hart bloei ink op papier.

    Gebruikers Aanlyn

    0 Lid, 1,220 gaste aanlyn

    Bydrae Totale