Boemelpaar
Bergies speel op tromme
en rook in hul longe
Die boemelaar en boemelvrou
is ongeskik màar streng getrou
Hul slaap al jare saam n uitgemaakte bokkompaar
Hulle swerf rond soos swaels met afgekoude naels
Skrop n leplek waar hul kom
en voer dit uit van kant tot kant
met swartsakke en ou koerant
As die winde die duine kam en alles sout word en klam
dan breek die boemelpaar hul halwe brood en vlam
Die bloutrein is vir hul die dood
n soort retoer na die oord
waar alles wag wat lekker is
en geen wet of wekker is
Noudat hulle vinnig ouer word
raak hulle plesiertjies ingekort
Die voete swel die are klont
en word nooit weer gesond
Wat word van so boemelpaar
op n dag is hulle nie meer daar
Val hulle soos blare op die grond
of waai hulle soos koerante rond.
1 Kommentaar
Maak 'n opvolg-bydrae
Jy moet aangemeld wees om 'n kommentaar te plaas.
Seirdna
Pragtig geskets. Sal nou anders dink oor ou windverwaaide koerante in afgelee straathoeke...