Welkom, Besoeker
Welkom, Besoeker

Titel: Verlossing

Deur Viooltjie
Datum gepubliseer: 24 Maart 2017 Aantal woorde: 203 111 Kere gelees 3

ek sou vir my ‘n wolk bid
voor die warm son
ek sou ‘n donderwolk bid
as ek dit net kon
een met volop water
in haar binnebuik
een wat mildlik reën stort
uit die oorloop
van haar boeppenskruik

ek sou vir my ‘n wind bid
wat noordwes waai
een wat nogal koud voel
een met vog belaai
ek sou ‘n woeste wind bid
en ek sou juig
as die takke van my bome
so weerloos
in sy asem buig

ek sou vir my ‘n berg bid
met ‘n sneeuwit kruin
ek sou ‘n bolandberg bid
met ‘n diep rafyn
watervalle oor die kranse
na ‘n groen vallei
rooiborsvinke tussen rietbos
wat nes bou
waar die vlaktes vlei

ek sou vir my ‘n storm bid
wat aanhou woed
tot al my leë riviere
weer voluit vloed
ek sou vir my ‘n dam bid
wat die dors verdrink
‘n duisend silwer mere
en strome
waarin water blink

ek sou vir my ‘n wolk bid
voor die hete son
ek sou ‘n donker wolk bid
as ek net maar kon
een gevul met baie water
en vol van lyf
wat wis hoe om verlossing
met druppels
oor die grond te skryf

© Carma Shaw
24 Maart 2017




  • TEMAS
    4 Kommentaar
    1. profiel foto van neels

      neels

      Maart 24, 2017

      absoluut fantasties Carma

    2. profiel foto van Elroux

      Elroux

      Maart 25, 2017

      So pragtig.

    Laat u kommentaar

    GESKRYF DEUR
    profiel foto van Viooltjie

    Jy moet ingeteken wees om boodskappe aan hierdie skrywer te kan stuur.

    Publikasies: 211
    Kommentaar telling: 724

    Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat ek te sê het, en dat julle lekker saam sal lees :-)

    Gebruikers Aanlyn

    0 Lid, 76 gaste aanlyn

    Bydrae Totale