Welkom, Besoeker
Welkom, Besoeker

Titel: Rose pienk en Jakarandas pers

Deur Viooltjie
Datum gepubliseer: 29 Mei 2017 Aantal woorde: 223 423 Kere gelees 2

Rose pienk en jakarandas pers,
ek sing vir jou ‘n bloublomvers
van laventelbos en roosmaryn,
van lelies geel soos die son se skyn.

Malvas bloei in die bloedste rooi.
Dis die swartoognooi wat flikkers gooi –
oor die heiningdraad rank haar ranke groen
sy kleur haar blomme in ryp lemoen.

Die muurblom wat so eenkant staan
het weer vandag haar bont rok aan.
Sy’s ‘n regte juffrou sorgeloos
in perske, lila en pruimframboos.

Suikerkan en kanferfoelie tuit –
vir jou speel ek op ‘n towerfluit
tussen steenboksriet en wildeals,
waar winde sag oor die fynbos wals.

Vergeet-my-niet lag van oor tot oor,
sy’t haar hart verpand aan ridderspoor.
Aanstons staan hul dalk op trou –
O’ as die liefde net sy geur behou.

Vlindervlerk wieg die grasklokkies.
Ballerinas dra hul se dansrokkies.
Sowaar’s wat tolbos teen die rante speel,
die vingerhoed het ‘n purper keel.

Bessie blou en katjiepiering wit.
Ek’t jou lief, my lief – nou weet jy dit,
sê papierblom vir die aronskelk
na sewejaar van nog nooitverwelk.

Pluime gras en ‘n blom van was,
ek vleg jou in my lintbos vas
voor die aandblom in die lig verdwyn
en dou verdamp uit die kelkiewyn.

Rose pienk en jakarandas pers.
Ek viool vir jou ‘n bloublomvers
van laventebos en roosmaryn,
van lelies geel soos die son se skyn.

© C. Shaw
9 November 2015




  • TEMAS
    6 Kommentaar
    1. profiel foto van Anze

      Anze

      September 22, 2016

      Pragtig, baie dankie vir jou bydrae tot die Lente projek

    2. profiel foto van Kiekies

      Kiekies

      September 22, 2016

      ….en jy viool hierdie vers soos ‘n ware maestro….manjefiek!!!

    3. neels

      September 23, 2016

      Waow Carma hierdie werk verdien n diamant een van jou bestes

    4. profiel foto van Viooltjie

      Viooltjie

      September 24, 2016

      Baie dankie, Kiekies en Neels. Ek waardeer julle kommentare sommer baie 🙂

    5. profiel foto van Amaspoke

      Amaspoke

      September 26, 2016

      Uitstekende werk !!!!!

    6. profiel foto van Viooltjie

      Viooltjie

      September 26, 2016

      Baie dankie, Amaspoke. Ek waardeer die mooi kommentaar 🙂

    Laat u kommentaar

    GESKRYF DEUR
    profiel foto van Viooltjie

    Jy moet ingeteken wees om boodskappe aan hierdie skrywer te kan stuur.

    Publikasies: 172
    Kommentaar telling: 695

    Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat ek te sê het, en dat julle lekker saam sal lees :-)

    Gebruikers Aanlyn

    1 Lid, 67 gaste aanlyn