Welkom, Besoeker
Welkom, Besoeker

Titel: Die DAME SHONAGON se KOPKUSSINGBOEK

Deur Toom
Datum gepubliseer: 5 April 2017 Aantal woorde: 430 328 Kere gelees 14

Die Dame Shonagon se Kopkussingboek

Die Keiser het die Keiserin in haar kamervlug besoek, en sy diener het agter hom aan ‘n stapel papier gedra. Dit was ‘n swaar las en het bestaan uit ‘n pak vars nuwe bloeiselwit papier wat ‘n ambassadeur hom as aantreegeskenk gebring het.

Majesteit,” het hy gesê, „Skattie, ek het momenteel soveel papier op kantoor, ek weet nie wat om daarmee aan te vang nie. Het u gebruik daarvoor, of het u êrens plek om dit op te bewaar?”

Hoei, Majesteitlief,” het sy deemoedig gehyg, „die laaste keer toe u ons met ‘n besoek geëer het, het u ook so ‘n pragtige meebringsel saamgevoer, en die voorlaaste, en . . .”

Ja, ja, Majesteitskat, maar kan u hierdie een ook nog gebruik? Of een van u eerbare hofdames miskien? Dit sou skade wees as dit êrens in ‘n kelder moes slegword en verkom.”

Nouja, dames, u het gehoor wat Keiserlike Majesteit sê. Het een van julle soveel minnaars dat sy soveel briefpapier nodig het?”

Aai, Majesteit is te koddig, …”

Ja, maar watter een van julle?”

As dit Majesteit belief, …”

Ja, Shonagon?”

As u my vir nie alte onwaardig aansien nie… Ek sou graag papier wou hê.”

Maar kind, het jy alreeds soveel minnaars? In jou ouderdom?”

Kie-hie, kie-hie. Shonagon het alreeds soveel minnaars!”

Stil, dames. Nou, Shonagon?”

Uiters graag sou ek ‘n kopkussingboek wou skryf …”

Kie-hie, kie-hie. Shonagon wil ‘n kopkussingboek skryf …”

Dames! Stil nou! En wat wil jy in so ‘n kopkussingboek opteken, kind?”

As dit u belief, keiserlike Majesteit, alles wat saans so deur my kop gaan. Wat in die loop van die dag gebeur het byvoorbeeld. Of my gedagtes oor die een of ander tema, in die hof, die kuns, die wetenskap, in die politiek, …”

Dan moet jy ons mos van tyd tot tyd daaruit voorlees, nie waar nie?”

En so het die Dame Shonagon haar eerste stapel papier gekry, en so het die Dame Shonagon begin om haar kopkussingboek te skryf, ‘n dagboek met liriese dele, waar sy haar liefde vir die natuur en ook alles wat esteties is, besing, met hoog-dramatiese passasies uit die vertellings van teruggekeerde matrose en uit onderhoude met besoekers uit verre lande, met menige kritiese bemerking oor die lewe aan die hof. En dit alles met so ‘n presiese waarnemingsvermoë en fyn vingerspitsgevoel, dat niemand – selfs die keiser – beledig kon wees nie. Sy is dikwels gevra om uit haar kopkussingboek voor te lees, geleentlik ook voor hoë besoek.

En so het die Dame Shonagon ‘n duisend jare gelede die basis gelê vir die Japaanse vertelkuns.

©.23e.Januarie2017…………………………………(.2012.).tje




  • TEMAS
    2 Kommentaar
    1. profiel foto van Toom

      Toom

      Januarie 24, 2017

      Hierdie verhaal behoort óók in die groep VERRE-OOSTLIKE VERHALE saam met ,Lang Moen en die Tier’ en ,die Keiser se Hoender.
      GvT

      • profiel foto van Toom

        Toom

        Januarie 29, 2017

        . . . asook in die versamelgroepering ,GROOT VROUENS IN DIE WÊRELDGESKIEDENIS’.
        GvT

    Laat u kommentaar

    GESKRYF DEUR
    profiel foto van Toom

    Jy moet ingeteken wees om boodskappe aan hierdie skrywer te kan stuur.

    Publikasies: 153
    Kommentaar telling: 157

    Wat ek weet, of meen dat ek weet, het ek onder meer op praktiese manier in die klaskamer geleer - aan en van die kinders - ook my belewenisse van konferensies en kongresse, dagblaaie, biertjies op die stoep en die gans normale daaglikse waansin. Byna vyftig jare woon ek al in Duitsland; eindelik kan gestolde gedagtes, verflenterde notatjies nou uit hul winterslaap wagword. My uitgangspunt is dat die woorde lekker moet proe, glad oor die tong moet rol. Alles wat ek skryf is outobiografies - ek het nie die geld vir die prokureur nie.

    Gebruikers Aanlyn

    0 Lid, 69 gaste aanlyn

    Bydrae Totale