Welkom, Besoeker
Welkom, Besoeker

Titel: ‘n Ander Eva . . . Eva* van die Kaap

Deur Viooltjie
Datum gepubliseer: 18 Maart 2017 Aantal woorde: 282 115 Kere gelees 3

Eva was ‘n meisiekind,
‘n Khoikhoi van die Kaap.
Bedags het sy in die veld gespeel,
snags het sy
onder die Suiderkruis
en ‘n goue maan geslaap.

Sy’t geweet hoe klink die uil se roep
en die jakkalswelp se huil.
Die kras van ‘n honger see-meeu
het in die holte van haar keel geskuil.
Ook die fluitsang van ‘n suikerbek
kon sy eggo met haar mond
en sy’t gewis hoe lyk elk bokkie
se vastrap op die grond.

*

Op ‘n dag in 1652
– aan die voet van Tafelberg –
het Eva op ‘n rots gesit
met ‘n fynbostakkie in haar hand.
Sy was doenig met patroontjies trek
in die sagte warm sand.

Maar sy het nie geweet nie –
dit was die sesde van April.
Van so ‘n dag en datum
had sy tog géén benul.

Neffens haar,
tussen gras en blaar
(met ore na die see gedraai)
was ‘n steenbokkie aan’t staar
oor die branders
van Tafelbaai.

En Eva het haar kop gelig
en dít toe ook gewaar . . .

Drie skepe op die horison
het vanuit die mis verskyn
en – vlugtig –
het die sorgloos’ lag
in haar helder oë gekwyn.

Die riete het geritsel
en haar voete was nog vry
‘wyl sy dart’lend deur die fynbos,
oor die klippers en die skulpgruis sny
(tot op die weskus-strand) –
om te kyk hoe Jan van Riebeeck
aan die punt van Afrika
kom land.

*

Eva was ‘n meisiekind
‘n Khoikhoi van die Kaap.
Die môre nog in die veld gespeel,
maar daardie áánd
onder ‘n donker hemel
en ‘n roesrooi maan
. . . gaan slaap.

© C. Shaw
10 April 2014

*Eva – die khoi meisie wat op 12jarige ouderdom deur Jan van Riebeeck se huishouding in diens geneem is.




  • TEMAS
    4 Kommentaar
    1. profiel foto van Elroux

      Elroux

      Maart 18, 2017

      Ek hou hiervan. Die koms van Jan van R uit ‘n unieke hoek beskryf.

      • profiel foto van Viooltjie

        Viooltjie

        Maart 18, 2017

        Bie dankie, Elroux. Ek waardeer jou saamlees en kommentaar baie 🙂

    2. profiel foto van Toom

      Toom

      Maart 18, 2017

      Wat ons – oor die hele wêreld – wéét, verdoppel elke tien minute of twee weke of tien jare of . . . Maar alles wat deur vergeet verloregaan, is nie min nie.
      Sulkes moet ons behou. Onthou.
      Dankie dat jy dit (so fyn!) opgeskryf het.
      GvT

      • profiel foto van Viooltjie

        Viooltjie

        Maart 18, 2017

        Baie dankie, Toom, vir jou saampraat en mooi kommentaar. Ek waardeer dit opreg 🙂

    Laat u kommentaar

    GESKRYF DEUR
    profiel foto van Viooltjie

    Jy moet ingeteken wees om boodskappe aan hierdie skrywer te kan stuur.

    Publikasies: 190
    Kommentaar telling: 703

    Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat ek te sê het, en dat julle lekker saam sal lees :-)

    Gebruikers Aanlyn

    1 Lid, 21 gaste aanlyn