Welkom, Besoeker
Welkom, Besoeker

Titel: MY VRIENDIN SE KOEK

Deur Francois Meyer
Datum gepubliseer: 3 Julie 2017 Aantal woorde: 375 68 Kere gelees 2

Ons was laat vir ‘n vriendin se verjaardagpartytjie en ek moes ‘n koek saamneem. Wanneer ek bak, word dit b(e)rou. Daar was anyway nie genoeg tyd om ‘n koek te bak nie. Ons het sommer by die naaste Spar gedraai om ‘n koek te koop. Die gespook en spartel vir tyd het my senuwees op hol gejaag en ek sien toe hulle wynrakke raak. Ek dink toe, kom ek koop maar vir my ‘n ou botteltjie.

So is ons sterk op pad na die partytjie se venue. Ek sit op die passasiersitplek; die helfte van die 1.5 liter Four Cousins reeds uitgedrink, want dit was ‘n lang dag. Ek sing al soos die verlore vyfde nefie saam die Cher treffer wat deur die motor se radio resoneer; vriendin se koek op my skoot. ‘n Paar meter verder gewaar ons ‘n verskeersbeampte langs die pad. Ek gooi die halwe bottel wyn op die agtersitplek, maak my veiligheidsgordel vas en sit die radio sagter. Gelukkig het hy ons nie afgetrek nie. Ons ry verder.

Nadat ‘n rooi verkeerslig ons tot stilstand gebring het, voel ek ‘n trilling. Die motorsleutels en die wynbottel klingel. Selfs die koek op my skoot is aan’t bewe. Skynbaar was dit ‘n aardbewing – wat sosiale media meer as die land laat skud het. Ons het die aardbewing oorleef en ry verder. Dit is herfs en raak redelik vroeg skemer in Bloemfontein. Skielik hardloop daar ‘n kat (of een of ander gedierte – ek is nie heeltemal seker wat dit was nie) oor die pad. Teen 100km per uur in ‘n residensiële gebied briek ons en swaai uit. Drift en square behoorlik soos ons draai.

Ek buig skuins-agteroor, strek en skeur amper my heup terwyl ek die wynbottel op die agtersitplek probeer red. Ek het hom nét betyds gevang voordat hy van die sitplek afgewetter het. ‘n Splitsekonde nadat ek die wyn gered het, briek die voertuig skielik vir nóg ‘n ding wat oor die pad hardloop. Hierdie keer was dit ‘n bobbejaan so groot soos ‘n mens. Ek kon nie mooi sien nie, want my vriendin se koek sit die hele windscreen vol.

Dit was die eerste en die laaste keer dat ek my vriendin se koek vervoer het…




  • TEMAS

    Laat u kommentaar

    GESKRYF DEUR
    profiel foto van Francois Meyer

    Jy moet ingeteken wees om boodskappe aan hierdie skrywer te kan stuur.

    Publikasies: 18
    Kommentaar telling: 18

    Francois Terblanche Meyer is op 21 Januarie 1994 in Bloemfontein gebore. Hy het in 2012 aan Hoërskool Fichardtpark gematrikuleer. Tempora Animus, Francois se debuut digbundel, is op 26 September 2013 en Onder die Dekmantel, sy tweede digbundel, op 17 Januarie 2015 vrygestel. Op 30 Oktober 2015 het Francois Onder die Dekmantel: Die Spesiale Uitgawe vrygestel – ‘n spesiale weergawe van Onder die Dekmantel asook Tempora Animus. Op 25 Junie 2016 het Francois sy amptelike derde digbundel, Digtershart, vrygestel. Dié bundel het na die aand van bekendstelling reeds 50% uitverkoop. Francois beskou dit as die laaste skoonskryf in ‘n trio van emosionele en persoonlike digbundels. Op 21 Januarie 2017 het Francois sy eerste prosastuk, Die wêreld deur haar oë, vrygestel. Dié boek vertel ‘n storie van ‘n vrou en haar stryd met Lupus (‘n outo-immuunsiekte) en raak aan die liggaamlike, emosionele en geestelike aspekte daarvan. Francois het Die wêreld deur haar oë aan sy ma, Anne-Marie Meyer, opgedra. “Die boek is my ma se getuienis en verhaal. Ek het die pad in haar skoene geloop tydens die skryf van hierdie boek, nadat sy in 2007 met Lupus gediagnoseer is. Die skryfproses van hierdie boek het my ook genees.” Francois het na bekendstelling van hierdie boek hande met Lupus SA (NPO 173-306) geneem en 10% van alle verkope van dié boek word aan hulle geskenk. ‘n Groot aanvraag het die Engelse weergawe, The world through her eyes, die lig laat sien op 5 Augustus 2017. Weens groot aanvraag na spoedige uitverkoping van vele oplae van sy eerste drie digbundels, het Francois op 15 Junie 2017 ‘n volledige omnibus van Tempora Animus, Onder die Dekmantel en Digtershart vrygestel. Hierdie versamelstuk (waarvan daar slegs ‘n beperkte hoeveelheid voorraad vrygestel is) staan bekend as Digtershart Drie-Kuns. Francois het op 9 September 2017 sy vierde digbundel, Pendulum, vrygestel. Pendulum se hooftema is ‘Tyd’ en bestaan uit 70 gedigte, waarvan elke gedig ‘n potlood / houtskool illustrasie deur Magda Labuschagne bevat. Op 4 November 2017 ontvang Francois twee toekennings by INK Skryf in Afrikaans se prestige gala-aand. Sy rubriek, Marlboro walms en skietgebede word as Rubriek van die jaar gekroon. Hy het ook ‘n tweede plek in die kategorie Digter van die jaar verower. Hy woon tans in Bloemfontein en sy grootste droom is om ander deur middel van kreatiwiteit in hul drome te laat glo. Hy staan ook sterk vir kreatiewe vryheid. “As jou drome jou nie bang maak nie, droom jy nie groot genoeg nie!”

    Gebruikers Aanlyn

    2 Lede, 55 gaste aanlyn

    Bydrae Totale