Welkom, Besoeker
Welkom, Besoeker
Taal waarskuwing*

Titel: MARLBORO WALMS EN SKIETGEBEDE

Deur Francois Meyer
Datum gepubliseer: 19 Julie 2017 Aantal woorde: 410 30 Kere gelees 3

Hulle sê mos mense wat nie vloek terwyl hulle bestuur nie, hou duidelik nie hulle oë op die pad nie. Ek praat nie van al die slaggate wat groter as ons president se fire pool is nie, maar eerder van diegene wat skielik agter ‘n bos uitspring, jou na jou asem laat snak en jou forseer om in ‘n kwessie van nul tot honderd in 0.5 sekondes jou verkeersgordel aan te sit.

Dit was 2013. Ons het ‘n voertuig in die Oos-Kaap gaan haal. Ek het nog my 1400 Golf gery – SONDER. ‘N. LISENSIE. Op pad terug na die Vrystaat, stop ons in Aliwal-Noord vir ‘n laatmiddagete. Pizza… en wyn! Een glasie is mos nog onder die drinkgrens en dit was ‘n lang dag op die pad.

Ons ry verder. My senuwees hang aan flarde. Ons is al verby twee padblokkades en op die Vrystaat se winterhorison sien ek nog ‘n spannetjie spoedspeurders. ‘n Gut feeling sê vir my dat ek nié third time lucky gaan wees nie. Soos ons nader aan die blouligbrigade kom, sweet my hande en dit voel kompleet asof ek die stuurwiel vol baba-olie smeer (op ‘n nie-kinky manier). Ek rook die een sigaret na die ander; wetend dat my asem na drank ruik en boonop het ek ook nie ‘n bestuurslisensie byderhand nie. Ek verander die woorde van die Lady Gaga liedjie wat oor die radio speel na “just drive… gonna be okay!”

My medebestuurder jaag soos ‘n besetene, maar ek weet as ek nou voet neersit gaan hulle foto’s van my neem sonder dat daar tyd gaan wees om te glimlag. Ek sien hy is deur die verkeersorgie en ek hoop en bid dat hulle tog so grootmoedig met my ook sal wees. Tevergeefs. Hulle trek my af. Ek parkeer langs die pad en probeer my broek droog hou. Tot my verbasing, kom daar ‘n jongerige spoedkoekie aangestap. Sy buk by die venster en dit was die eerste keer in my lewe dat ek bedags die melkweg gesien het. Ek draai die venster oop, gee vir haar twee blou skille en sê: “Gaan kry vir jou KFC vir aandete.”

Sy neem dit en wens my ‘n voorspoedige reis toe. Ek sou nie toegelaat het dat so ‘n stuifmeelkoekie haar driewiel voor my kom spin nie. Later daardie aand in Bloemfontein toe ek die motor se deur oopmaak, sien jy net Marlboro walms en skietgebede die lug beklouter… Volgende keer sal ek harder bid en minder rook.




  • TEMAS
    4 Kommentaar
    1. profiel foto van Okatopi

      Okatopi

      Julie 19, 2017

      Ja nee 🙂

    2. profiel foto van Poetrydancer

      Poetrydancer

      Julie 19, 2017

      Francois, ek het hierdie stukkie nou rerig geniet. Lekker lees humor prentjie. Pragtige beelde van die baba olie nie vir plesier nie en dan in die slot waar die walms beskryf word.

      • profiel foto van Francois Meyer

        Francois Meyer

        Julie 21, 2017

        Ek is bly dat jy dit geniet het! Baie dankie vir jou saamlees! 🙂

    Laat u kommentaar

    GESKRYF DEUR
    profiel foto van Francois Meyer

    Jy moet ingeteken wees om boodskappe aan hierdie skrywer te kan stuur.

    Publikasies: 10
    Kommentaar telling: 20

    Francois Terblanche Meyer is op 21 Januarie 1994 in Bloemfontein gebore. Hy het in 2012 aan Hoërskool Fichardtpark gematrikuleer. Tempora Animus, Francois se debuut digbundel, is op 26 September 2013 en Onder die Dekmantel, sy tweede digbundel, op 17 Januarie 2015 vrygestel. Onder die Dekmantel se eerste oplaag het binne ses maande uitverkoop. Op 30 Oktober 2015 het Francois Onder die Dekmantel: Die Spesiale Uitgawe vrygestel – ‘n spesiale hermeesterde weergawe vanOnder die Dekmantel asook Tempora Animus. Op 25 Junie 2016 het Francois sy amptelike derde digbundel, Digtershart, vrygestel. Dié bundel het na die aand van bekendstelling reeds 50% uitverkoop. Francois beskou dit as die laaste skoonskryf in ‘n trio van emosionele en persoonlike digbundels. Op 21 Januarie 2017 het Francois sy eerste prosastuk, Die wêreld deur haar oë, bekendgestel. Dié boek vertel ‘n storie van ‘n vrou en haar stryd met Lupus (‘n outo-immuun siekte) en raak aan die liggaamlike, emosionele en geestelike aspekte daarvan. Francois het Die wêreld deur haar oë aan sy ma, Anne-Marie Meyer, opgedra. “Die boek is my ma se getuienis en verhaal. Ek het die pad in haar skoene geloop tydens die skryf van hierdie boek, nadat sy in 2007 met Lupus gediagnoseer is. Die skryfproses van hierdie boek het my ook genees.” Francois het na bekendstelling van hierdie boek hande met Lupus SA (NPO 173-306) gevat en 10% van alle verkope van dié boek word aan hulle geskenk. Weens groot aanvraag na spoedige uitverkoping van vele oplae van sy eerste drie digbundels, het Francois op 15 Junie 2017 ‘n volledige omnibus van Tempora AnimusOnder die Dekmantel en Digtershart vrygestel. Hierdie versamelstuk (waarvan daar slegs ‘n beperkte hoeveelheid voorraad vrygestel is) staan bekend as Digtershart Drie-Kuns. Tydens 2011 was hy ook een van die finaliste in die finale rondte van die Senwes Entrepreneurs Kompetisie met sy grafiese ontwerp besigheid, Logo Worx (nou Infinitum Projects), wat hy reeds op 16-jarige ouderdom gestig het.  Op 8 Julie 2015 het Francois ‘n platform vir die Afrikaanse Kuns en Kultuur, naamlik KunsWeb, gestig. Op 28 Oktober 2016 moes Francois sielswroegend van KunsWeb afskeid neem na bietjie meer as ‘n jaar van groot sukses. Hierdie besluit het tot gemengde reaksie gelei. Nadat Francois ook ‘n groot verskil in verskeie opkomende digters en skrywers se lewens gemaak het, het hy sy persoonlike tyd saam met sy familie bo sy beroep se sukses gekies. Hy woon tans in Bloemfontein en sy grootste droom is om ander deur middel van kreatiwiteit in hul drome te laat glo. Hy staan ook sterk vir kreatiewe vryheid. “As jou drome jou nie bang maak nie, droom jy nie groot genoeg nie!”

    Gebruikers Aanlyn

    0 Lid, 99 gaste aanlyn