Welkom, Besoeker
Welkom, Besoeker

Titel: Magiese realisme

Deur Ernst
Datum gepubliseer: 18 Junie 2017 Aantal woorde: 160 44 Kere gelees 2

Magiese realisme

ʼn Kiewiet trippel rond
soos ʼn Beatle op Acid
“Lucy in the Sky with Diamonds”
drie treë vorentoe, wieg-wieg
linkerpoot in die lug –
in gitswart kykers
draai ʼn rolbos om en om.

Met my rug teen die growwe bruin
van ʼn perskeboom, bekyk ek die kring:
groen, onwrikbaar groen,
die lug het omgedop in dieper blou,
fyn haartjies op ʼn perske
ʼn takkie knak
en die vrug val in my hand.

Veerwolke valskerm
na ʼn sorgvrye tyd
met die smaak van kondensmelk
reën en son –
ek vergaap my aan die goddelose kaalkopman:*
“Do what thou wilt shall be the whole of the law.”

Winde tregter in my (wan)begrip
oor die gehekel van tyd,
splinter in simbiose
met die vormlose negende uur:
“Eloï, Eloï, lama sabagtáni?”

Ek struikel teen verganklikheid
maar omhels tóg ʼn blinde jaargety
in hierdie spasie
van magiese realiteit.

© Ernst Fernando dos Santos

* Aleister Crowley soos hy op die Beatles se Sgt. Pepper’s Lonely Hearts Club Band
album verskyn het.




  • TEMAS
    4 Kommentaar
    1. profiel foto van Francois Meyer

      Francois Meyer

      Julie 5, 2017

      Unieke samevatting van beelde. Ek hou hiervan!

    2. profiel foto van Ernst

      Ernst

      Julie 5, 2017

      Baie dankie Francois

    3. profiel foto van Inkmoderator

      Inkmoderator

      Julie 21, 2017

      Ernst, dit is ‘n grootte hierdie. Baie metaforiek, baie beelde, baie inligting en ‘n magiese slot. Ek vind dit moeilik om jou werk te krit, nie omdat ek nie weet hoe om dit te doen nie, maar eerder omdat dit alleronnodig is. Jy is ‘n slim skrywer wat presies weet waarheen jy die vers wil neem en in die meeste van pogings juis daarin slaag. Ek geniet jou werk baie en voel ‘blessed’ (jammer vir die engels) om daarin te deel.

      Skryfgroete
      IM

    4. profiel foto van Ernst

      Ernst

      Julie 21, 2017

      Jy sit vanoggend ‘n glimlag op my gesig met jou woorde – soos ‘n druppel heuning op my tong 🙂 Baie dankie IM, mooi dag vir jou 🙂 🙂

    Laat u kommentaar

    GESKRYF DEUR
    profiel foto van Ernst

    Jy moet ingeteken wees om boodskappe aan hierdie skrywer te kan stuur.

    Publikasies: 19
    Kommentaar telling: 30

    Gebruikers Aanlyn

    0 Lid, 56 gaste aanlyn