Welkom, Besoeker
Welkom, Besoeker

Titel: Hierdie kind van Afrika

Deur Viooltjie
Datum gepubliseer: 25 September 2017 Aantal woorde: 330 40 Kere gelees 2

Waar was ek
toe als nog so stikdonker was
lank voor die eerste lig’t verskyn,
toe U twee klippe kap tot vonk –
waar was die kruitvat,
waar die lont?
Hoe vurig die geboorte van die son.

Was ek daar
toe U die sterre deur die heelal string,
toe U die maan poleer tot edeltin –
haar vol kraters kerf en loslaat
om tot in alle ewigheid
deur die hemelruim te swerf?

Het ek aanskou
hoe U die droë grond
van die waters skei –
hoe het U dit reggekry
om die grense vas te stel
waar branders in die sand wegsink
en met watter beker
het U die mere vol geskink?

Waar was ek
toe U die berge en die dale
met u hande vorm,
toe die eerste waters oor die Drakensberg
se kranse val 
en aan die groot rivier geboorte gee,
toe U haar laat kronkel
deur die dorre aarde
en haar laat uitmond in die see?

Was ek neffens U
toe U die eerste blom laat bloei,
die eerste Kremetart laat groei
en die vrugte aan haar takke hang?
Toe U die biesies langs die stroompie plant –
was ek daar
aan U linker- of U regterkant?

Waar was ek
toe die eerste arend na benede daal
en ‘n geelvis uit die water haal,
toe ‘n springbok vir die eerste maal
so witgat-kromrug pronk –
was dit oor Karoo se bos
of oor Kgalagadi roesrooi grond?

En toe U na die werke van U hande kyk
(gesê het “dit is goed”)
was ek aanwesig, Here –
dalk net ‘n wéét in U gemoed?

Het U oor die Vrystaatvlak gestaar?
Was ek toe dáár
wyl die naguiltjie sy weemoedslied refrein,
was ek die groot gedagte,
het U aan my gedink,
was ek in die sagte lig
wat in U skeppersoë
reeds blink?

*

Waar was ek
wyl U die eerste Adam in die wieg neerlê –
het U lippe
(in ‘n preweling)
toe ook hiérdie kind van Afrika
se naam gesê?

© Carma Shaw




  • TEMAS
    4 Kommentaar
    1. profiel foto van Koekekranka

      Koekekranka

      September 26, 2017

      So…so… so amper onbegryplik, verstommend mooi! Pragtige werkie wat ek beslis sal lees, oor lees, herlees. Regtig aangrypend vir my.

    2. Viooltjie

      September 26, 2017

      Baie dankie, Koekekranka. Ek is baie bly dat jy my gedig gelees het. Dos vir my ‘n voorreg 🙂

    3. profiel foto van Calice

      Calice

      September 26, 2017

      Besonders!

    Laat u kommentaar

    GESKRYF DEUR
    profiel foto van Viooltjie

    Jy moet ingeteken wees om boodskappe aan hierdie skrywer te kan stuur.

    Publikasies: 211
    Kommentaar telling: 725

    Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat ek te sê het, en dat julle lekker saam sal lees :-)

    Gebruikers Aanlyn

    0 Lid, 83 gaste aanlyn

    Bydrae Totale