Welkom, Besoeker
Welkom, Besoeker

Titel: Heilige ibis*

Deur Viooltjie
Datum gepubliseer: 17 Mei 2017 Aantal woorde: 234 118 Kere gelees 2

Die son kom op net waar sy wil
en wys haar mooiste kleure
oor Blue Downs* en Driftsands* se duine.
Sy strooi haar gloed oor wilde tuine
wat weinig meer as sand en boegoe is.

Sy steek haar kop deur rook en mis
en vly haar skoonste lig oor roet en as –
dáár
waar net gister nog, die helse vure was.
En sonder oordeel skyn sy bloedig rooi
‘wyl sy die hemel soos framboos,
tot in die diepste diep oranje tooi.

Die son breek deur die donker wolk
en glim oor kuile en ‘n vlei
waarom die groenste riete groei.
Sy laat blink die laaste winter waters
wat nog in (amper droë) riviere vloei.

Sy gloei voor Helderberg se hang,
oor witgeverfde huise
waar die rykes woon.
Sy vlam oor fynbos en oor vlaktegras,
oor voetpad en teen heinings vas
waar agter plakkers
in plank- en sinkgehugte droom.

Die son skyn waar sy wil –
oor taxi’s en blink motors
en rus vir oomblikke verblindend, stil
bo ‘n brug wat oor die N2 baan.

En hóóg,
waar – in ambergoud – haar strale dans,
kruis ‘n ibis teen die hemeltrans.
En hy sprei sy vlerke vry en wyd . . .
in ‘n skadubeeld van heiligheid.

© C. Shaw
9 Januarie 2017

* heilige ibis – wit- en swartgekleurde ibisvoël

* Driftsands – ‘n reservaat ongeveer 20 km vanaf Kaapstad langs die R300 en die N2

* Blue Downs – ‘n informele woongebied aangrensend aan Driftsands




  • TEMAS
    6 Kommentaar
    1. profiel foto van Anze

      Anze

      April 6, 2017

      Pragtig, baie dankie vir jou bydrae tot die April se ope afdeling projek

    2. profiel foto van Elroux

      Elroux

      April 6, 2017

      Allerliefliks

    3. profiel foto van Koekekranka

      Koekekranka

      Mei 18, 2017

      Laat die spoor van hierdie son kom naloop om die heiligheid van die ibis-beeld te kon deel, maar dan ten minste betyds om die prag van jou werkie te kan geniet. Vir my is die saamreis pragtig, meelewend. Dankie!

    4. profiel foto van Boetiegoed

      Boetiegoed

      Mei 25, 2017

      Carma, dit is eenvoudig pragtig! Ek kan my ook altyd verwonder wanneer ek die son sien deurbreek deur wolke met die strale afge-ets op die kante!

      • profiel foto van Viooltjie

        Viooltjie

        Mei 25, 2017

        Baie, baie dankie, Boetiegoed. Ek is bly jy het die skrywe geniet 🙂

    Laat u kommentaar

    GESKRYF DEUR
    profiel foto van Viooltjie

    Jy moet ingeteken wees om boodskappe aan hierdie skrywer te kan stuur.

    Publikasies: 172
    Kommentaar telling: 695

    Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat ek te sê het, en dat julle lekker saam sal lees :-)

    Gebruikers Aanlyn

    1 Lid, 76 gaste aanlyn