Welkom, Besoeker
Welkom, Besoeker

Titel: Die Veldmuis

Deur Ronel Janse van Vuuren
Datum gepubliseer: 4 September 2017 Aantal woorde: 358 23 Kere gelees 2

‘n Yswind waai die droë gras en blare oor die bruin veld. Die hase hardloop en boks wanneer hulle mekaar se paaie kruis. Blou-grys tarentale wei in hul trop – die enigste kleur in die dorre gebied. ‘n Muis skarrel agter ‘n dorre boom in en hou als nuuskierig dop.

Feetjies land saggies agter ‘n groot miershoop, hul verf, sade en ander gereedskap reg vir die nuwe seisoen. Die wind hou op waai noudat hulle dit nie meer aanpor nie.

‘Julle weet wat om te doen,’ sê hul leier.

Nes elke lente voor dié een plant hulle sade, sing vir die blomme en bosse om te groei, verf nuwe blare helder groen en leer die voëls om weer te sing.

‘Waarom?’ vra die Assassyn die Feë Koningin waar hulle buite sig agter die Sluier staan.

‘Want hulle het almal nodig om te hoop.’

Sy glimlag toe ‘n rooikat met nuut-geverfde sleutelblomme verby hardloop, ‘n paar wimpel-Feë jillend op sy spoor.

‘Hul hoop bou ons magiese kragte. Moenie die mag van emosies onderskat nie, Cian.’

Sy hou al die klein seisoen Feë dop terwyl hulle hul bes doen om die Yskoningin se werk ontdaan te maak. Hul energie en hoop spoel oor haar en die veld soos ‘n vars lente briesie.

‘Dit gaan nie genoeg wees nie…’ die Assassyn bly doodstil toe ‘n muis nuuskierig voor hom tot stilstand kom en die lug snuif. Vir ‘n paar oomblikke hou hy die dier dop voordat die roep van ‘n seisoen Fee die muis se aandag na kos skuif.

Die Feë Koningin lag saggies.

‘Ontspan, Cian. Dinge het dalk verander – baie verander – maar hoop is een van daardie emosies wat mens, dier en fee aan klou en veral sterk voel wanneer lente kom.’

Hulle hou die aktiwiteit op die veld vir ‘n paar oomblikke langer dop, die son hoog in die hemelblou lug. Die muis kyk weer vir hulle, maar voordat hy terug na hulle kan hardloop verdwyn die Assassyn en Feë Koningin.

Die muis strek lekker in die son en geniet die aandag van die Feë wat hom voer en borsel. Lente is altyd welkom na ‘n lang, honger winter.




  • TEMAS
    1 Kommentaar
    1. profiel foto van Anze

      Anze

      September 4, 2017

      Pragtig, baie dankie vir jou bydrae tot die September – Lente projek 

    Laat u kommentaar

    GESKRYF DEUR
    profiel foto van Ronel Janse van Vuuren

    Jy moet ingeteken wees om boodskappe aan hierdie skrywer te kan stuur.

    Publikasies: 44
    Kommentaar telling: 243

    Daagliks skryf ek die stories neer wat in my kop woel. Of dit nou oor olifante en kabouters in die Knysna bos is en of dit oor ‘n tienermeisie is wat die wêreld moet red, ek is daar.My wêreld draai om my twee Rottweiler seuns – hulle leer my om die perfekte dag na te streef, want vandag kan die laaste wees. Die perfekte dag: lag, dink en huil. Om te skryf maak elke dag die perfekte dag. In 2016 was ek ook benoem as Verhaalskrywer van die jaar hier op INK. Ek kan gevolg word op Twitter @miladyronel en meer van my gedagtes kan gevind word op my blog https://ronelthemythmaker.wordpress.com/.

    Gebruikers Aanlyn

    2 Lede, 99 gaste aanlyn