Welkom, Besoeker
Welkom, Besoeker

Titel: Broos, hanteer saggies

Deur Viooltjie
Datum gepubliseer: 16 April 2017 Aantal woorde: 191 140 Kere gelees 4

Sy post prentjies op haar timeline
purper, pers en pruimframboos –
elke foto het ‘n blompot
elke blompot het ‘n roos.

Soms staar sy net deur ruite
oor ‘n kuspad,
na die see.
Soms ruik sy net die soutwind
en die witmis
wat stil oor Valsbaaistrande vee –

totdat lankal-koue koffie
haar uit drome laat ontwaak
en haar t’rug laat loop kombuis toe
om warm kruietee te maak.

Sy verf blomme op haar canvas
purper, pers en pruimframboos –
die kleurespel en beelde
verloën haar hart
se bitterbroos.

Op facebook praat sy engels –
(maar sy huil in Afrikaans)
van immerhoop om eendag weer
verby die asspoor
wat die liefde los
tot in die sonskyn te mag dans.

Elke oggend breek die branders,
saans sak die son
– soos ‘n skildery –
in purper, pers en pruimframboos
by haar horison verby.

En sy wil nog graag op reis gaan
maar vir nóú bly sy eers tuis
(voor ‘n venster met ‘n sea view)
en rus in die beskutting
van haar eenslaapkamerhuis.

*

Sy post prentjies op haar timeline
purper, pers en pruimframboos.
Op elke foto kraak ‘n blompot
in elke blompot
knak ‘n roos.

© Carma Shaw
15 April 2017




  • TEMAS
    4 Kommentaar
    1. profiel foto van neels

      neels

      April 18, 2017

      Carma ek is mal oor hierdie ene

    2. profiel foto van Anze

      Anze

      April 18, 2017

      Pragtig, baie dankie vir jou bydrae tot die April ope afdeling projek 

    Laat u kommentaar

    GESKRYF DEUR
    profiel foto van Viooltjie

    Jy moet ingeteken wees om boodskappe aan hierdie skrywer te kan stuur.

    Publikasies: 192
    Kommentaar telling: 707

    Ek skryf grotendeels gedigte vir ontspanning. Ek skryf graag oor die natuur, mense en hul stories en plekke wat ek besoek het. Ek doen dikwels 'n bietjie navorsing oor 'n onderwerp voor ek skryf, want ek geniet dit om te leer. Ek hoop altyd om darem 'n emosie of twee wakker te maak met dit wat ek te sê het, en dat julle lekker saam sal lees :-)

    Gebruikers Aanlyn

    2 Lede, 27 gaste aanlyn